Зоз Шветочним концертом означени 70 роки КУД „Тарас Шевченко”

ДЮРДЬОВ – У Дюрдьове, всоботу, 28. новембра, Културно-уметнїцке дружтво (КУД) „Тарас Шевченко” отримало Шветочни концерт з нагоди 70 рокох од снованя КУД. КУД настал з дюрдьовского Месного одбору Рускей матки, чия Сновательна  скупштина була праве на нєшкайши дзень, 30. новембра 1945. року, а 1948. року Одбор прероснул до самостойного Културно-просвитного дружтво „Тарас Шевченко”. На Виберанковей скупштини 1981. року є пременоване до Културно-уметнїцкого Дружтва.

Присутних на Шветочним концерту всоботу привитал предсидатель Скупштини КУД Мирослав Чакан, а ювилей повинчовали и предсидатель Националного совиту Руснацох Славка Рац и длугорочни спонзор Дружтва Юлин Еделински.

- Седемдзешат роки нє мало, то рочнїца хтора нас обавязує же бизме ше здогадли на шицких котри пред нами були Руснаци на тих просторох, котри ше тримали свойого и у своїм ше цешели. З тим своїм шведоченьом нас обавязую и же бизме и надалєй витирвали на тей драги – гварел Славко Рац

Винчуюци ювилей, зоз жаданьом же би ище длуго тирвало, Юлин Еделински Дружтву придал урамиковани українски гривнї на хторих Тарас Шевченко, хтори КУД подаровал Дюрдьовчан Дьордє Шовлянски-Цуков, котри тераз жиє у Новим Садзе.

През двогодзинову програму и конферансу, хтору водзели Оля Балїнт и Тарас Чапко, представена робота Дружтва од снованя по нєшка. Попри терашнїх, у велїх з двацец шейсц шпивацких, рецитаторских, музично-оркестерских, ґлумецких и танєчних точкох наступели и дакедишнї члени секцийох, так же ше на бини зменьовали вецей ґенерациї аматерох, од найстарших по предшколцох. На концу Дзецински инструментални оркестер одграл шпиванку „Дай нам Боже добри час”, хтору на бини одшпивали шицки учашнїки у програми Шветочного концерту.

Програму пририхтали терашнї уметнїцки руководителє секцийох Михал Лїкар, Звонко Барна, Сенка Станкович, Яким Гарди, Блаженка Тимко Станкович, Марина Сабадош, Тамара Салаг и Мария Хромиш.

Сала Задружного дому була полна з публику, хтора виведзени точки наградзовала  з нєпреривнима аплаузами. У публики були и дакедишнї аматере, члени управних одборох, як и бувши предсидателє Дружтва од 1981. року по нєшка – Яким Тиркайла, Владимир Рац, Яким Гарди, Мирослав Ґубаш, Вадимир Тиркайла, Любомир Тиркайла, Мирослав Чакан, Маринко Дудаш и терашнї предсидатель Микола Кухар.

Попри на початку спомнутих, медзи госцами були и заменїк предсидателя Националного совиту Русанцох Йовґен Мудри, директор Заводу за културу Войводянских Руснацох Серґей Тамаш, предсидателька Совиту Месней заєднїци Дюрдьов Леона Виславски и други.

Преслава ювилею предлужена з друженьом у просторийох КУД, дзе гудаци вецей ґенерацийох грали руски шпиванки, та ше и танцовало и шпивало. Шицки учашнїки на Концерту и дакедишнї и терашнї члени Дружтва достали беджи з амблемом КУД „Тарас Шевченко”.

Rutenpress



PRIJATELJ UDRUŽENJA - Lokalna Medijska Inicijativa PRIJATELJ UDRUŽENJA - Lokalna Medijska Inicijativa
PRIJATELJ UDRUŽENJA - Lokalna Medijska Inicijativa PRIJATELJ UDRUŽENJA - Lokalna Medijska Inicijativa
Share this article

About author

LMI - NVO

Lokalna Medijska Inicijativa

Adresa sajta www.lmi.org.rs
Top
We use cookies to improve our website. By continuing to use this website, you are giving consent to cookies being used. More details…